Kominn smá sumarfiðringur í kerluna

Já það er ekki alveg laust við að það sé kominn smá sumarfiðringur í kerluna.  Er verið að undirbúa fellihýsið okkar fyrir ferðalög sumarsins og áðan fékk húsbandið góða afmælisgjöf sem nýtist vel í framtíðar útilegum (set kannski inn mynd af því seinna).  Húsbandið verður nefnilega fertugur eftir rúmlega viku - jamm ég náði mér í unglamb sko haha kerlan sjálf náði jú að slefa í töluna 46 um daginn.

Svo hefst sumarfríið okkar eftir helgina og þá verður veðurspáin skoðuð og síðan ákveðið hvort og þá hvenær land verður lagt undir fót og hjól.  Eitthvað á að gera allavega þó ekki sé nú nein fastákveðin ferðaáætlun.  Sennileg afleiðing þessa sumarfílings frúarinnar verður því að eitthvað verður minna bloggað hér á sumarmánuðum.  Kannski ég gerist bara sunnudagabloggari eins og Gunnar minn góði bloggvinur.  En það verða þá að vera sunnudagar eftir minni hentisemi því eins er vísst að maður verði ekki í tölvusambandi á hinum eiginlegu sunnudögum

Litla skottið er orðin eldhress og meira að segja rígmontin þessa dagana að taka sína fyrstu göngutúra alein.  Ekki eru þeir nú langir eða svona um 2-3 metrar flestir, ef þeir ná slíkri lengd.  Skottið verður nefnilega svo stolt yfir þessu mikla afreki sínu að hún skellihlær svo að hún barasta hlunkast á bossann Yndislegt bara

Ég er allavega alsæl þessa dagana og sé alltaf betur og betur hve heppin ég er með lífið mitt í dag.  Ég á yndislega fjölskyldu og vini og er alltaf að kynnast fleirum og fleirum sem svo gott er að hafa í sínu lífi.  Ég er mjög sæl með mína vinnu og hlakka til í hvert skipti að mæta - það eru nú ekki lítil hlunnindi.  Ég hef mikið verið að hugsa um hve sæl ég er með mitt líf í dag og fannst bara frábært að lesa leiðsögn dagsins í dag.  Hún smellpassar einmitt við þessar hugsanir mínar og hljóðar svona:

28.maí

 

Hvað er sönn gleði í lífinu?  Þetta er erfið spurning - og margir hugsuðir og heimspekingar hafa velt henni fyrir sér.  Gleði getur fljótt horfið fyrir þjáningu.  Gleði er stutt og þjáning er löng.  Það sem gengur í þjóðfélaginu sem gleði er yfirborðskennt.  Það stenst ekki samanburð við gleðina sem kemur frá hinu leynda lögmáli.  Lykillinn liggur í að rækta hugarástand þar sem við getum lýst yfir skilyrðislaust að lífið sjálft sé gleði.  Þetta er tilgangur búddískrar iðkunnar okkar.

 

 

Athugasemdir

[Linda Linnet Hilmarsdóttir, 28.5.2008 kl. 20:46]

Knús knús og þúsund kossar

[Gunnar Helgi Eysteinsson, 28.5.2008 kl. 21:09]

Þú getur alltaf verið Laugardagsbloggari... föstudagsbloggari...

[Sporðdrekinn, 29.5.2008 kl. 01:21]

Bara yndislegt að ferða um landið okkar á þennan hátt. Mín góð með unglambið

Þessar elskur eru svo stolt þegar að þau eru farin að labba

Leiðsögn dagsins er góð, ég ætti að reyna að tileinka mér hana.

[Gunnar Páll Gunnarsson, 29.5.2008 kl. 03:41]

Svo er bara eftir að óska þér og þínum góðs og gengis í sumarfríinu og gaman að heyra/lesa hversu hress sú litla er orðin. Við getum svo skift okkur í dagsbloggara. Td. trúmál á miðvikudögum, helgin, matur og önnur lífsgleði á fimmtudögum, umræðan og annað rövl á mánudögum og stórar og fræðandi greinar á sunnudögum. Alveg eins og í gamla daga með aukablöð moggans. Sammála þér og Búdda um lífið og gleðina.

Keyrið varlega og njótið Íslensku náttúrunnar í botn.

Gunni Palli kokkur 

[Gunnar Helgi Eysteinsson, 29.5.2008 kl. 08:05]

PS
Ég var að senda þér e-póst.