Við getum haft áhrif til batnaðar. Beitum okkur – á annan hátt.

Fékk eftirfarandi sent frá trúfélaga og finnst þetta bara svo gott verkefni að ég ákvað að skella þessu hér inn og hvet allar konur (karlar velkomnir að biðja með okkur líka ) til að taka þátt.

 

Nú virðast sannarlega ýmsar blikur vera á lofti í efnahagsmálum, stjórnmálum, kjaramálum, heilbrigðismálum og menntamálum. Svona mætti lengi telja. Blöðin og aðrir fjölmiðlar flytja okkur endalausar frásagnir af hörmungum og hversu slæmt útlitið er til framtíðar. Það mætti jafnvel halda að náttúruöflin séu með í þessu sjónarspili, sem ætlar að gera okkur lífið erfitt.

    Sumir kunna að segja sem svo, að sú framtíð sem blasir við í efnahagsmálunum hefði verið fyrirsjáanleg fyrir allnokkru, því að óráðsía getur af sér skuldasúpu. Hvað er þá til ráða? Án efa hafa allt of margir - og allt of lengi látið  reka á reiðanum. Og lengi hefur það verið svo, að mikill meirihluti ráðamanna hér hafa verið karlkyns.

     Við kvenfólk höfum oftar en ekki, í tímans rás, hallað okkur aftur og leyft körlunum að bera ábyrgð og stjórna. Þetta hefur samt tilhneigingu til að breytast þegar ástandið versnar. Það mætti eflaust færa skotheld rök fyrir því, að valdaleysi kvenfólks og vilja- eða getuleysi okkar til að beita okkur í mikilvægum málefnum er varða heildina, sé óbein orsök fyrir því ófremdarástandi sem nú virðist blasa við.

      Það er hefðbundið hlutverk kvenna, og kannski að einhverju leyti erfðafræðilegt, að hugsa um börnin og framtíð þeirra. Það gæti útskýrt viðbrögðin að einhverju leyti. Ef allt virðist stefna á versta veg er framtíð barnanna og barnabarnanna í hættu og okkur er ekki lengur til setunnar boðið.

     Nú er tíminn til að bretta upp ermarnar konur. Betra er seint en aldrei og ekki er að vita nema að með samtaka mætti, sem okkur er einum lagið, megi snúa öllu til betri vegar.  

Ég veit það fyrir víst að hér á landi eru starfandi fjölmargir hópar kvenna af ýmsu tagi, sem dæmi eru starfandi bænahópar í öllum trúarhópum, heilunarhringir, leshringir, matarklúbbar og saumaklúbbar.

     Einn hópur er ísl. kvennahópur í SGI sem eru búddísk-friðar og mannúðarsamtök. Við höfum gert það að aðalásetningi okkar fyrir 2008 að sameinast um að styrkja hverja aðra svo að við getum látið gott af okkur leiða í stærra samhengi. Við viljum hvetja allar konur til að sameinast um þetta með okkur.

      Það skiptir ekki máli hvaða trú þú aðhyllist, eða hvort þú telur þig vera trúlausa. Ef þú vilt þá getur þú verið með. Á hverju sunnudagskvöldi ætlum við, hver á sinn hátt, að biðja fyrir auknum styrk og hamingju kvenna. Þetta getum við gert hver fyrir sig heima hjá okkur eða með öðrum.

     Með því að beina bænum okkar (eða markvissum óskum) samtímis að því sama, er enginn vafi á því, að breytingar munu gera vart við sig. Hafið hugfast að við gerum þetta til að birta breytingar til batnaðar.

      Í fyrstu einbeitum við okkur að hamingju þeirra kvenna sem standa okkur næst og tengjast okkur fjölskyldu-eða vináttuböndum. Síðan eru það konurnar í hverfinu okkar og í bænum þar sem við búum. Þar næst konurnar í landinu okkar og svo á allri jörðinni. Þetta er aðalbænarefnið okkar öll sunnudagskvöld næstu 3 mánuði ársins, febrúar, mars og apríl. Næstu 3 mánuði maí, júní og júlí gerum við eins, nema um afkvæmin okkar og öll börn. Í ágúst, september og október er komið að körlunum og síðustu 2 mánuði ársins beinum við bænunum og huganum á sunnudagskvöldum að umhverfi okkar og lífheiminum í heild sinni.

      Þær sem vilja láta minna sig á með tölvupósti á sunnudögum geta sent póstfang sitt til [e-mail].  En öllum er frjálst að taka þátt og því fleiri sem það gera, því meiri árangur munum við eflaust sjá í kjölfarið.

 

Höfundur er meðlimur í Soka Gakkai á Íslandi sem eru friðar og mannúðarsamtök.

 

Athugasemdir

[Gunnar Helgi Eysteinsson, 26.1.2008 kl. 14:42]

Ég er sammála þér Dísa Dóra og ég styð þetta 100 %.

(Ég fer ekki með bænir)

[Steinunn Helga Sigurðardóttir, 26.1.2008 kl. 14:43]

fallegt !

 Bless á laugardegi

steina 

[Sporðdrekinn, 26.1.2008 kl. 20:43]

Ég er með.

[www.zordis.com, 26.1.2008 kl. 21:01]

Að biðja er jafn mikilvægt og að þiggja hjálpina.  Bænir gera kraftaverk þegar trúin flytur hana með sterkum viljanum.

Kærleikur til þín!

[Linda Linnet Hilmarsdóttir, 26.1.2008 kl. 23:39]

[Dísa Dóra, 27.1.2008 kl. 10:37]

Gunnar - eins og kemur fram þarna þarf ekki að biðja bænir heldur er hægt að hugsa bara ákveðnar hugsanir um þetta málefni

Dua - kl. 20 - 21

Frábært að það vilja fleiri vera með

[Gunnar Helgi Eysteinsson, 27.1.2008 kl. 12:00]

Ok